العجايز||موزة ومريم||وتطورات العصر

[تفاح اخضر]

كيف حالكم يا عيالي..من زمااااان ما سولفت معكم..بس عاد هالمرة ما بسولف معكم وحدي بتكون معي العجوز مريم بخراريفها الغاوية بيكون تعرفوها ما يحتاج اخبركم عن سوالفها

المهم يا عيالي أنا والعجوز مريم قررنا ننزل هالموضوع هنا عشان نخبركم عن كمين سالفة صارت معنا وطبعا السوالف كلها تخص هالجيل بو تو طالع وكل يوم مطلعين خروفة جديدة ..

عارفة اني دورتلكم براسكم لكن عاد الايام الجاية ان شاء الله سوالفنا بتعجبكم وبو ما تعجبه يخبرني عشان اراويه بشغله

وهالمرة الخراريف مرة بتكون علي وعشر مرات على العجوز مريم

عااااد هال هالله ما اوصيكم ما ابا حد يزعل وياخذ على خاطره منا ترانا عجايز وكل شي عندنا جايز..وعاد هنا نريد رايكم الحماسيشن وخلو عنكم المجاملات ..

ولا حد ينشر صورنا أهااا عيب

وقبل لا انسى أول خروفة بتكون باذن الله عن هذا التلفون بو مجنن الأوادم اسمه البي بي اوين

اسميه مطفر بالاوادم قاموا يمشيوا ويخرفوا عمرهم

يالله اشوفكم مع خروفتنا القادمة

((مع العلم ترى الموضوع متجدد وكل فترة بنجيبلكم خروفة غاوية))

مع تحيات :

حبوتكم موزة
وحبوتكم مريم

لحظة لحظة ،، اول شي من هذه العجوز مريم ؟!!
لا يكون تقصديني انا !!
واااااا فديتني انا ،، ماعندي خبر اني اشتهرت كما ذيك السفنجة بو يسموها (سوبنج رووب) ،،

والله فكرة وااااجد غاااويه ،، وصاه حنوه انا وانتيه ما ورانا شي ،، جالسين قدام دلة القهوة ونشرب هالقهوة اتقولوا ماي في عز الصيف ،،



وراح نبدأ بهذا بو يسمووه بي بيه واامووه
الشيمة عن اسب احسن اقول البلاك بيري وبس ،،

[مشاعر]

هههههههههه


والله حركاااااااااااات عجايزنا

[تفاح اخضر]

هاااااااااااي هااا يا بنتي ما قصرت على الجهالووه حتى العجوز مريم بغت تفضحنا يوم اشترته

يالعجوز موزة من قالش اني اشتريت بي بيييه ؟!!

ما اشتريته ،، اخييييييييييييه

حيوه انا بشتري هذاك اللي بالي بالش ،،


قالت بغت تفضحنا قالت

عجوز دبه

[تفاح اخضر]

لما اروح عند الاهل ، او عند الجيران او المستشفى او المحلات التجارية او الخياط اي مكان ،، اسمع صوت ،، كل ثانية اسمع هالصوت ،، ولما سألت عن هالصوت قالولي هذا البلاك بيري يصوي كذا ،،
صاهم منزلين برامج 24 ساعة عالنت والماسنجر مع العالم كله ، عشان كذا تحصلوا عيونهم 24 ساعة ع شاشة البي بيييه ،، واصابعهم خلالص تبرمجن على الضغط على الازرار ،، وصار يجيهم هوس بعد ،، كل شوي يشوفوا التلفون حتى لو ماجتهم رسالة ،،

بق حالة والله حاله ،،


بروح اشرب قهوة شوي وراجعتلكم ،،



العجوز : مريم

[الروح]

ههههه وربي سوالف العجايز ما تنمل ~
خاصة إذا دخلوا عرض في سوالف التكنلوجيـــــــآ .. "طلع التخميس "
أما هال ( BB) مع أنه اسمه أحبه وآآآآآآآآيد لأنه فيه حروفي مرتين ^_^
بس هالجهاز صمم خصيصا لأصحاب الأعمال واللي يحتاجوا يتواصلوا عبر الايميل بشكل دائم ..
بس العرب "الله يعينهم " ~ يستخدمووه للماسنجر والتشاتينج ,,
السوالف ببلآش .. والوقت ضــآيع .. والرقـآبه معدووووومه .. والدين مجهول .. والشيطان "يفرررر" من الفرح __>الفر أقوى من يطييييير

فديتكن تعالن عندي أقهويكن ,, ونسولف مع بعض ^_^

[تفاح اخضر]

السلام عليكن عجايز ...
عليك السلام يا وليدنا
كيف حالكن عساكن بخير ونعمة اسمع خروفه وهرجة منتشرة تسولفن عنها ..
الحمدلله بخير ،، لووه وااااجد عندنا خروفات ،، حياك تفضل سمع خراريفنا ،،
اما هذا بويسموه البي بي مادري ليش هالأيام واحد من الربع جالس يعلمني عليه لكني شخصيا ماأشتريته بعدني .. ولا بشتريه بعد..وتريدوا الصراحة شكلي هونت منه وسامحت ..
احسن لك عن المشاكل والله
تعرفوا ليش .. لأني اشوف حالت ربيعنا كسيفه.. الرصيد كل يوم مخلص .. هذا شئ والشئ الآخر يدينه دومه ماسكه هالبي بي وهو موجود معنا وماموجود لما نجلس مع بعض وحالته صعيبة صدقوني إني هونت دام كذا الحالة ..
كييه ياولدي كلهم داقنهم هالمرض الحوس ، ومستسلمين له بعد بكل فخر ،،
اهاا ابوي قاوموا شويه ،، هجعوا عنه شويه ،، لكن البر ما يتنازلوا عن شوفة شاشته 24 ساعة ،،

أنا الحين وتلفون عادي ومامتواحي على الرسائل العادية من اصدقائنا المعروفين فمابالكم من اصدقاء مجهولين وكلن يغني على ليلاه وكلن يسعى لهدف معين .. الله يعين ..
انا تو عندي البجلي ولونه سود بعد ،، بس متوحيه حا الرسائل ،،
هعييييييشن

لا وبعده يراوينا رسالة بالماسنجر مال بلاك بيري عن وحدة تقول وناشرة إن وحدة من صديقاتها ماخذه صورها وجالسه تنشرهن وتطالب الحين كل من توصله الصورة إنه يمسحها لأنها اوين بنت ناس .. طيب وين انتي قبل لما خذت او عطته الصور ؟؟!! عجايب ومصايب زمن
الله يرحمنا ويستر علينا ..
نوووووووبه ،، وحالموه هي هذه الغبية الدهجة ترسل صورها حا الشباب ،، !!
وااا واجد غاوي شكلها وبايه تتفشر ،،
خبرها تجي عندي انا اعرف كيف امسح صورتها من عند كل شخص ،،
قالت بنت ناس قالت
واابوي واابوي عليهاااااااااا ،،


ويسلمن العجايز وعند العييايز كل شئ جايز ..
ومن دق الباب جاه الجواب ..

فديتنا حنا العجايز ،،

مو جاي تخطب وااموه !! صاه ما موافقين نزوجك بنيتنا
نيااااهاهاهههاهااااااااا

[تفاح اخضر]

ههههه وربي سوالف العجايز ما تنمل ~
فديتنا دومنا سوالفنا حلوه وماتنمل ،،

خاصة إذا دخلوا عرض في سوالف التكنلوجيـــــــآ .. "طلع التخميس "
نخمس بالسوالف ولا نخمس بالسيارات في الشوارع ونقتل الاوادم ،،

أما هال ( bb) مع أنه اسمه أحبه وآآآآآآآآيد لأنه فيه حروفي مرتين ^_^
اقول بنتي ،، لا تتفشري واجد ،، صاه الفشار يقتل ،، دبه وحده ،، هعهعهههعهع

بس هالجهاز صمم خصيصا لأصحاب الأعمال واللي يحتاجوا يتواصلوا عبر الايميل بشكل دائم ..
صح والله ،، حا اصحاب الاعماليشن لانهم يريدوا يخلصوا معاملاتهم بسرعة عن طريق الايميل والماسنجر ،،
بس العرب "الله يعينهم " ~ يستخدمووه للماسنجر والتشاتينج ,,
لكن بو عندنا مالت عليهم ،، يستخدموه عشان يتعرفوا على بعض والسوالف البايخه والتي احيانا عواقبها لا تحمد ،، اعوذ بالله منهم ،،
موزوه جيبي الخيزرانه جيبي اطلع غمي فيهم ،،
يستخدمووه للماسنجر والتشاتينج ,,
بنتي : مو يعني شاشينج ؟
اكله صينية وااموووه!!1
السوالف ببلآش ..
ببلاش!! عجب اريد ،، هعييشن
والوقت ضــآيع ..
ياااربي ،، حتى الوقت ضاع ،، يقني قصدش صار صايع واامووه تقصدي ؟ صاه مافهمتش يوو بنتي !!
والرقـآبه معدووووومه ..
صدقش والله ،، ماشي لا رقيب ولا حسيب ،، خاصة عند البنات ،، الشعر من صوب والبلاك بيري من صوب ،،
موزووووووووووووووووه هينش ؟!!! صاه بطفر منهم صاه

والدين مجهول ..
لاحول ولا قوة الا بالله ،، لا ويفتخروا انهم مايصلوا ،،
تو صلاتهم البلاك بيري الحوس ،،
حسبي الله ونعم الوكيل ،،

والشيطان "يفرررر" من الفرح __>الفر أقوى من يطييييير
صح انه يفررر ،، فارررلهم بعقولهم

فديتكن تعالن عندي أقهويكن ,, ونسولف مع بعض ^_^
تقهويينا ولا ترشينا يالشحروره ،
انتي تعالي تقهوي عندنا ،

يسلموو رحرووحه عالمشاركة الحلوه

[عاشقة السلطنة]

أنا هناااااا يووووووووووووووووو اختي مريوووووووووووووم مو هناك عندش تنهميني

سمعتش تقولي باية خيزران وانا بعدني ازيدش زنوبة وحبة عسو اندوش هاه

وعاد تراني جايبتلش العسو بكبرة عشان تكسريه في ظهورهم

[عاشقة السلطنة]

عاد الله يسلمكم بخبركم عن سالفة فتوح ام كشة وبي بييه مالها,,,بيكون تعرفوها فتوح هذيك الدغما بو ما بغت ولدي عشان اسمه جمعة

المهم يا عيالي ذاك اليوم سرنا انا وجمعان وخطفنا على مريوم شليناها معنا رايحين نزور حرمة اخوي سعادة أم سويدة الوجه فتوح

مسيكينة وحليلها الحرمة عويقة شوية قلنا نشرف عليها

المهم عاد يوم وصلنا البيت جموع راح عنا وانا مريوم دخلنا صوب سعادة لقيناها نايمة وحدها مسيكينة في الصالة وماحد جالس عندها وهي حرمة مريضة

سلمنا عليها وجلسنا معها عاد يوم سألتها عن فتوح وحالمووو مخلتنها وحدها قالتلي عوين فتوح في حجرتها عاد صارلها بيكون شهر ما تطلع تجلس معهم عوين مشغولة
ما اعرف مو ذا المنكر بو شاغلنها عن اهلها

عاد انا قلت اروح اناديها تجي تجلس عندنا شوية

دقيت الباب لين تكسرن صبوعي ما فتحت ولا ردت

وحدي ما حرصتها سيدة دخلت ولقيت البنت متيبسة ماشي يتحرك فيها غير صبوعها وعيونها
قلتلها فتوووح ما ردت مرة ومرتين وثلاث ولهي الحالة قلت البنت فيها سقم
ونهمت مريوووم قلتلها يوووووووووووووووووووووووووومريوووووووووووووووووووم تعالي هنااا

جات مريوم مسيكينة تركض واندبغت عند الباب زين ما افتلعت

كلمتها يووو بنتي فتوووح مو فيش ما تردي

ما ردت عليها وذيلاك الصبوع يتحركن والعيون يترقصن وما اعرفها مو حاطة في ذنينها وشوية تضحك وشوية تسكت أظن البنية جنت

عاد مريوووم ما سوتلها سالفة راحت صوبها وشلت التلفون من يدها عاد هنا البنت طشت كنه لادغنها حنش اوين انتوا كيف دخلتوا هنا ومن سمحلكم

قالتلها مريوووم..وابوي عليش وابوي سويدة الوجه تعالي ضربينا بالمرة هذا جزاتنا خايفين عليش قلنا البنت مريضة نجي نشوفها خطفي قدامي اشوف جلسي مع امش والا تو بسقيش بهالخيزرانة امش مريضة ترريد اللي يساعدها وانتي خاشتيلي في حجرتش
عاد تعرفوها فتوح ام لسان ما يحتاج اخبركم عنها تبقبقت لين قالت بس لكن طبعا ما يخفى عليكم ان العجوز مريم ماحد يروم عليها خلتها تروح غصب عن خشمها الصالة

لكن اسميها من دخلت الصالة وهي مصدعتنا معنا وما معنا نعم صبوعها ملزقات في ذاك التلفون وكل شوية طرن وطرن لوعتلنا كبودنا وكل ما نقولها شي لازم نعيده مية مرة عشان تسمع

عاد مريوم ارتفع ضغطها ولوحت عليها بزنوبة جاتها سيدة في الراس قالتلها خطفي من قدامي اشوفش لا اللحين اكسر هالمنكر بو ماسكتنه فوق راسش

وراحت فتوح ام كشة كالعادة وهي تتبقبق وخبرتنا سعادة ان البنت من اشترت هالتلفون ماشي غير ماسكتنه لا متفيقة تاكل ولا متفيقة تطلع حتى يوم تجلس مع الاوادم تجلس على صوب وتخاسي هالعلة البي بيه مالها

قلنا عسى ربي يهديها ويهدي هالشباب بو هالتلفون طفرلهم بعقولهم وعيونهم وبعدهم عن اهلهم واصحابهم..

المهم جلسنا مع سعادة وسليناها وبعدين جانا جموع وشلنا في الطريق خبرناه عن فتوح قال يو ماااه ما فتوح وبس بو كذا حالتها تعالي السوق والمراكز بتشوفي الخير حتى الشياب والجهالوه عندهم وكل واحد يمشي ويدعم مرة جدار ومرة يندبغ والدنيا ماشية..الله يصلحهم..

بس يا عيالي هذي قصتنا مع البي بي والمرة الجاية ان شاء الله نشوفكم من خروفة جديدة تتكلم اكيد عن قضية جديدة

حبوتكم مورة
حبوتكم مريم

[الجوهرة المكنونة]

أبداااااااااااااااااااع ربي يحفظكن وتعمرن أكثر وأكثر علشان نعرف سوالفكن أكثر أكثر
,,