طلب ..... ايها الاعضاء الكرام

[الفرق اني عماني]

السلام عليكم ورحمة الله وبركاته
بغيت من الاخوة طلب بسيط
ودي اتعلم لهجة اهل الباطنة بالاخص لهجة اهل صحم وصحار
وجزاكم الله خيرا :56:

[الوالي]

شبااااااااااااااااااااب إلي يعرف ما يقصر مع اختنا

[الفرق اني عماني]

احسنت الوالي
عسالله يردون

[مسكـ سلطآني]

هههههههههه فديييتج يا الغالية ..

شبيك لبيك اهل الباطنة بين اديج

كيف نعلمج .. انتي قولي كلمات واحنا نعلمج اكيد

واااااايدين مال الباطنة في منتدانا .. الخير واايد

رووزي

شوق الغرام

بغداد

ولد الباطنة

مجنون تايه

وغيرهم الكثير

[Nourouk]

ونوبه أنا .!!!!

صح كلام أختي مسك الخليج أكتبي الكلمات وإن شاء الله ما بنقصر معاااش

[مسكـ سلطآني]

آه .. عيد

انوروك انت من الباطنه .. وللا من مسقط


عيّاااااار .. انزين من وين في الباطنه ؟؟؟ هاه جاوب

[ضـــوء القمـــر]

السلام عليكم وحرمة الله وبركاته

فديت الباطنه أنا

وأنا باطنيه لاه وش فيكم .. خخخخخخخخ

بس ما بقول من هين هع

هين = وين !!!!!!!

ضــــــ..!ــ؟ــوء

[اسيرالغرام]

هاه كلكم من الباطنه
فديت انا الباطنه واهلها

[الفرق اني عماني]

اشكر الجميع مرورهم الطيب على موضوعي
وهالحماس من اهل الباطنة
يسلمون كل اهل الباطنة والله
حاابة اتعلم كل الكلمات
اممممممممممم يعني مثلا بالنسبة لاهل الداخلية يقولون حتروا بمعنى شوفوا
اهل الباطنة شو يقولون ؟؟؟؟؟؟؟؟؟؟؟

[شُموخيـﮯ يكسرﮒ]

الباطنه اللي بها يهنأ المقام ديرتي روضٍ به الناظر يحير

يلا حيوووا اهل الباااطنه حيوووهم

فديتكم ... الحين كلكم طلعتوا من الباطنه

حتروا:confused: بمعنى شوفوا:confused:

هههه تصدقوون اول مره اسمع كلمة حتروا .... يبالي اسأل عنقيد يمكن يعرف لأنه من هناك

اختي احن نقولها .... شوفوا .... هاي ما تفرق عندنا

وتفرق اللهجات على حسب كل منطقه

اقول لج الكلمات تفرق عندنا شوي

صديقتي .... ربيعتي

اريد .... ابا

ايوا ... هيه

الملعقه عندكم مقمشه .... احن نقولها خاشوقه او قفشه

روح ... سير

هاي تفرق على حسب النطق بس

وطبعا مب كل اهل الباطنه يتكلمون بهالطريقه

الفرق اني عمااني

ابا اسألج سؤاال

انتي من وين ؟؟ !!أدري انج عمانيه بس وين في عمان ؟؟

[الفرق اني عماني]

اشكرك اختي شوق الغرام
اول مرة اسمع "خاشوقة " بصراحة تعلمت كلمة جديدة
بالنسبة لسؤالك انا من وين فأنا من الشرقية
بس لا تسألوني كثير انا صار لي فترة عايشة بمسقط
يعني اجيد كلمات بسيطة

[حورالعين]

أهل الشرجية تكلموا يقريبا نفس اهل الباطنة

عندنا كلمات مثلا:
انام ...........ارجد
اجلس........اجعد
انتظر.........انطر


وجي.......بس احس شيء عطينا كلمات ونحن نجول لج شو هم باللهجة اهل الباطنة

[مسكـ سلطآني]

صحيح .. بس ياحور.. احن نقول ..( نتريّا) .. يعني ننتظر

حلو =غاوي

سيارة = موتر

( اش حقّه ) وتعني بأي حق أو لماذا

كبت = خزانه الملابس

بوش = مجموعه الجمال


غرشه = زجاجه

كشخه = زين او تعبر عن اعجابك بشئ



سامان= أغراض

شرات = مثل
ربيع = صديق

ما تيوز = ما تترك

خلاف = بعدين

منّز= سرير الطفل..

راقد= نايم

الطوي=البئر

طشونه=شويه

يالس = جالس

بنيه = بنت

الدوبي= اللي يكوي الملابس


وربما يكون هناك تشابه وتقارب في بعض الكلمات بيننا وبين اخواننا في الدول الخليجيه الاخرى,,

[الفرق اني عماني]

اشكرك اختي مسك الخليج على هالكلمات :kash5a:
جميلة جدا هي لهجة اهل الباطنة
وبعض الكلمات احنا في الشرقية نستخدمها
حلو=غاوي
سامان=أغراض
زجاجة=غرشة
راقد=نايم
الطوي=البئر
ونختلف في بعضها مثل
نتريا= نحرص
بس اول مرة اسمع كلمة "طشونة":confused:

[الفرق اني عماني]

طيب كيف المناشده عندكم يا اهل الباطنة ؟

[شُموخيـﮯ يكسرﮒ]

اي مناشده صراحه ما ادري شو ينشدون ...

خذ .... هاك




لي عوده بكلمات يديده

[ضـــوء القمـــر]

كيف حالكم مو الاخبار والعلوم من صوبكم حي الله وسهلا يا مرحبا .. مو حال الاهل والأصحاب


كيف الصحه .. قرب اليوم العشى عندنا خخخخخ >>> هذي المناشده صح الفرق أني عماني


كل الكلمات اللي تم ذكرها من مسكـ وشوق وفرق أني عماني نحن نستخدمها

وأحتر = شوف تستخدم بس أنا لا

نحن = حنوه

[مسكـ سلطآني]

آسفة ضو ء القمر .. احنا ما نقول حنو ه.. نقول احنا .. أو نحن


وليش سلطنة عمان الدولة الخليجية الوحيدة اللي عندها اكثر من لهجة

فلهجة سكان المنطقة الشرقية تختلف عن لهجة سكان المنطقة الداخلية ولهجة سكان المنطقة الداخلية تختلف

عن لهجة سكان منطقة الباطنة ولهجة سكان منطقة الباطنة تختلف عن لهجة سكان منطقة الظاهرة ولهجة

سكان منطقة الظاهرة تختلف عن لهجة محافظة مسندم

اما لهجة سكان محافظة ظفار تختلف عن جميع لهجات سكان المحافظات العمانية لانها قريبة جدا من لهجة سكان دولة اليمن


ههههههههههه وهذي حالتنا خخخخخخخخ

حالة مأساوية صح ؟؟

وانا كلامي خلطة سحرية خخخخخ

[ليريوات .com]

لهجات اهل الباطنه كثيره وتختلف من ولايه الى ولايه وحتى من منطقه الى منطقه وحتى من حاره الى حاره

وبهذا يريد لك كتاب كبيييير لكي تتعلمي

[ضـــوء القمـــر]

مسكـ أعتقد أنه قلنا تختلف من منطقه لمنطقه .. ياخي تستخدم بالبلد وأنا مالي ..

وبعدين نحن جالسين نعلمه لهجت أهل الباطنه وأهل الباطنه مليووووووون لهجه خخخخخخخ

>>> البنت ما تتكلم كذا خير شر .. بس الفرق أني عماني .. خلاها تجيبه كله من أول وتالي

هع سلااااااااام

[مسكـ سلطآني]

ضوء القمر .... الاخت قالت انها تبي لهجة اهل صحار وصحم بالاخص

ههههههه وحرام تعلمونها كلام قح مال البلاد (رستاك ) خخخخخخخخ

وانا اصلي من صحار .. معناته اقدر اعلمها ..


بس حسافة مال مسقط خربولي لهجتي الغاوية مال صحار العفية

[الفرق اني عماني]

ليش مسك الخليج انتي ساكنة بمسقط حاليا؟

[مسكـ سلطآني]

لا ...بعدني في الباطنة !!!!!

ليش انا قلت اني من مسقط ؟!؟!؟!؟!

هههههههه

هاه بشّري تعلمتي شي وللا بعدج

[الفرق اني عماني]

لا بس قلتي مال مسقط خربولك لهجتك الغاوية صحار العفية ......خخخخخخخخخ
عموما تعلمت كلمات ولو ان بعضها كنت اعرفها بس ما كنت ادرك انها اللهجة الخاصة باهل صحار الله يعطيكم العافية ما قصرتوا يا اهل الباطنة دومكم للخير سباقيين

[ضـــوء القمـــر]

مسكـ هدي يابنت الناس من قالكـ إني رستاكيه ع قولتكـ خخخخخخخخ

أقول مسكـ عادي ترا المسرح أقصد المكان مكانكـ ولا يهمكـ

خخخخخخخخخخ

وبعدين وش فيهم أهل الرستاق .. لا تطنزي ع أي مخلوق كان .. كلهم أصول :cool:

[مسكـ سلطآني]

سوري ضوء القمر ما كنت اقصد بكلامي الطنازة او ما شابه .. انا كل اللي كنت ابغي ابينه هو ان الاخت الفرق اني عماني تبغي لهجة اهل صحاار مو اهل الولايات الثانية في الباطنة مع احترامي لكل اهل الباطنة عموماً ..

وانا مش ممثلة عشان اكون على مسرح خخخخخخخ

وردي على كلام الاخت الفرق اني عماني ..

ههههههه خيتووو انا ولايتي الحالية قريبة من مسقط بس هي ولاية في الباطنه


وآآآآسفة حبوبة ضوء القمر .. ارجوج لا تاخذي بخاطرج شي ..

ولووو احنا اخواات

وما اعتقد ان هناك زعل بيننا

بايوو .. ابا قلووبكم صافية هاه

[شُموخيـﮯ يكسرﮒ]

ههههههههههههههههههههه


قلبتوها لديوانيه البنات حق السوالف هاه

الله يستر بس .... ههههههههه

[عروس البحر]

السلام عليكم وحرمة الله وبركاته
فديت الباطنه أنا
وأنا باطنيه لاه وش فيكم .. خخخخخخخخ
بس ما بقول من هين هع
هين = وين !!!!!!!
ضــــــ..!ــ؟ــوء
حتى أنا من الباطنه أعتقد أنتي من السويق أذا ماخاب ظني

[شُموخيـﮯ يكسرﮒ]

.


هي من مسقط ..؟؟!! ما صح قمووووره

[حورالعين]

شكلها من صحاااااار

[ضـــوء القمـــر]

شواقه من هي اللي من مسقط أنا ولادتي مسقط وحياتي كلها بمسقط بس أنا من الباطنه ..

أصولي هناكـ أجدادي هناكـ .. جذوري هناكـ .. بس مش من صحار .. ولا صحم ..

وسوري مسكـ دخلت خشمي في شي ما يعنيني عادي يعني :biggrin:

وأنا ما أشيل ع خاطري من أحد أياً كان .. وعسى أختنا الفرق أني عماني تستفيد منكم

إحتراماتي للجميع .. سلاااااااااااااااااااااام

[شُموخيـﮯ يكسرﮒ]

.


شفتوا كيييييييييييييف ... شووووق ذكيه ههههههه توقعاتي في محلها

[مسكـ سلطآني]

في زمانك محد يشيل همك
لاحبيبك ولاأخوك ولا رفيقك
ماتهم اللي يهمك
في زمانك لوبغيت تعيش صح؟
صـــــل فرضك
واقضب ارضك
وحب اللي يحبك
خلك قنوع
خلك صبور
خلك حريص
لاتسأل إلا من سأل عنك