قصائد للشاعر حامد زيد ..

[ضـــوء القمـــر]

السلام عليكم ورحمة الله وبركاته



_:- التمثال -:_

عفا الله عن خطا غدر الخناجر والضلـوع ابطـال
باسامح واتركك تحـت الظـلام الحالـك لحالـك
دخيلك وفر دموعـك تـرى هـدر الدمـوع اذلال
وترى مافيه احد يصبر مثـل صبـري بغربالـك
انا عيب علي انقـض كلامـي والرجـال افعـال
واذا قلت اقطـع حبالـك ترانـي بقطـع حبالـك
عشان اكسب هدب عيني تجرعت العذاب اشكـال
وليتـك تـراف بحالـي علشـان اراف بحـالـك
مسـوي فـي حياتـي شـي مايذكـر ولا ينقـال
حتى العـدو واهـو العـدو مـا يعمـل اعمالـك
تمسيني علـى الهـم وتصبحنـي علـى الغربـال
تقلطنـي فناجيلـك وتقـصـر عـنـي دلالــك
تحملت التعب لاجلـك وانـا حملـي يهـد جبـال
رحلت من العذاب ومـا وقفـت الا علـى جالـك
علامك كلمـا اجيـك متواضـع جيتنـي تختـال
معاك اليا متى باصبر وصبري معك يحلـى لـك
مثل مـا اقبلـت لعيونـك لـزوم تلدلـي باقبـال
ومثل ما قد حشمتك حس واحشـم قلبـي اشوالـك
انـا محـد بجابرنـي اسايـر معـك هالمـنـوال
ترى مانـي تبيـع لـك ولانـي اصغـر عيالـك
انا حبيت اعشقك نبض ومشاعر ما اعشقك تمثـال
انا جيت اسكنك واحياك وابقى فيـك وابقـى لـك
انا جيت اب ظمى عاشق تعب يطرد سراب الـلال
انا جيت استفز رضاك مـن فرقـاك والجـا لـك
انا ما همت بك عاقل انـا كنـت اعشقـك بخبـال
انا ما كنت احبك حي انـا كنـت اعشقـك هالـك
تخيل من كثر مـا خفـت تلقـى للزعـل مدخـال
اخاف اخطي على طيفك وادوس برجلـي ظلالـك
تبعتك والعـرب تتبـع رعـود البـارق الهمـال
وانا شفت المطـر يتبعـك فـي حلـك وترحالـك
كأن الي خلق حسنك خلقني مـع جسـدك ظـلال
وصرت اقرب جسد يمشي معك باقفـاك واقبالـك
ابـي قلبـك يحـس انـه فقـد بمحبتـه رجـال
ملكته من هدب عين وخسـرت ارضـاه باهمالـك
صحيح ان الفراق اقسى ولكـن الوصـال محـال
وانا صعب على ارضي غرورك واضعف قبالـك
بعـد مـا حققـت عينـي فبعـدك للرقـاد امـال
اعـود للسهـر! ياخـوي فــال الله ولا فـالـك
ببدل نظرتك فيني واجـي لـك كـل يـوم بحـال
باكون اقـرب مـن ثيابـك عليـك ولا اتهيالـك
بالمك وانثرك واجمعك وارجـع انثـرك باهمـال
باخونك وازعلك وارضيك وازعل منك وارضى لك
ابرسم بالثرى وجهك وابدفـن صورتـك برمـال
ابشكي للعـرب فرقـاك واضحـك عنـد عذالـك
ابهديك الوصال فراق واهديـك الفـراق وصـال
باسوي مثل ما اشوفـك تسـوي وافعـل افعالـك
عشان تعرف من فينا الزعول ومن وسيـع البـال
ابيـك تـذوق فنجالـي وانـا بـاذوق فنجـالـك
نصيحه واحتفظ فيها قصر معك الزمـن او طـال
ابي تسمع كلامـي زيـن وتحطـه علـى بالـك
اذا حبك هبال اطفال لـك عنـدي هبـال اطفـال
ولا وابشـر بعـد بهبـال حـب ماهـو بهبالـك
واذا قصدك تهين اسمي عشـان تشمـت العـذال
ترى لا انت ولا غيرك ولا عشره مـن اشكالـك!!


أقـــــــرب النـــــاس

بمشي على درب لـه النـاس يسعـون
واصـد عـن درب الدجـي والعتامـة


وبقصر اليسرة عـن الضيـم والهـون
وطلـق يمينـي للصخـا والكـرامـة


وبحترم نفسي وانـا شخـص ممنـون
ومن يحترم نفسـة وجـوب احترامـه


ماني من اللي في ذرى الحيط يمشـون
ولامـن اللـي معتلـي فـي مقـامـه


متواضع وأمشي على الحـق بالهـون
متـوسـط المعـرفـة والشـهـامـة


ولي مجلس دايـم لـه النـاس يلفـون
شرعـت بابـه والــدلال العـلامـه


مايفتـح الا فيـه الاجــواد يـدنـون
ويالله عسـى اللـي يقـرب للسلامـه


هذا طريقـي وكثـر النـاس يـدرون
صديـت عـن درب حلالـه حرامـه


ميزت ربعـي بيـن عاقـل ومجنـون
واكشف بليـد المنفعـة مـن سلامـه


واهل المصالح لو علـى يـوم يبنـون
فـي يـوم ثانـي يرغبـون الهدامـه


واهل الحكي لو لك عن الناس يحكـون
بيجيـك يـوم ويقصـدك فـي كلامـه


لاصار سيفة لاقـرب النـاس مسنـون
يضرب رفيقة وان اقوى في عضامـه


ناس مـع الكلمـة يروحـون ويجـون
بـس المصيبـة يـدعـون الفهـامـه


ولانيـب ديـان ولانـيـب مـديـون
ولا بغيـت مـن الهـروج المـلامـه


ولاطلبـت مـن المخاليـق يبـكـون
ولا بغيـت مـن الحزيـن ابتسـامـه


بمشي بدربي واتـرك النـاس يمشـون
كلن علـى كيفـه رقـى كـل هامـه


ولا صرت انا من راعي الطيب مطعون
ابيستـوي قـرب الرفيـق وعـدامـه


وأن خاب ضني بأقرب الناس وشلـون
بعطيـك ضنـي يارفـيـق النـدامـه


قــــصة حيــــاة

جتني ظـروف للكـدر مستعـده
قامت تحدد لي الاحـزان ميعـاد


مرة مع حظـي ومـرات ضـده
واليا تكدر خاطر القلـب تـزداد


في دنية خلقت على النـاس نـده
مردودها للخير تجـرح واجهـاد


إتجي على المظلوم وتبيـح سـده
واتجي على الظالم تساهيل وامداد


والصدق فيها ما لقى مـن يعـده
والكذب يلقى له مع الناس شهـاد


واللي فقد حـق عجـز يستـرده
يصبح على تسديدة الدين معتـاد


ومسكين من راد الزمـن يستبـده
عيت عليه اقـدار الايـام تنقـاد


تطرح به الدنيا على القـاع مـده
مثل الفريسـة والمقاديـر صيـاد


ضاعت حياته في لحاف ومخـده
عدت عليه ايـام بغفـول ورقـاد


وماله عن دروب الوعر من يصده
ولا هو عن دروب السلامات نشاد


تلطمه مو جات القدر فوق خـده
وتخطي به الخطوة من بلاد لبلاد


حبله قريـب وعاجـز لا يشـده
يحسب جميع الناس قاصين وبعاد


عاند حياتـه لـو حياتـه تحـده
وادى سنينه كلهـا عنـاد بعنـاد


إصحى من الغفلة ترى العمر حده
للوقت سجاتـه وللمـوت ميعـاد


وهذي هي الدنيا تجـي مستجـده
تلقا بها المازح وتلقا بهـا الجـاد


قصـة حيـاة ومننـا مستـمـدة
ويلزمها تنفيذ وإخـراج وإعـداد


عشنا على كف القدر فـوق يـده
الله خلقنا عباد ونفنـي لـه عبـاد


ولا حاصـل للحـي ماكـان وده
ولا حاصل للي يموتـون ميـلاد


ويكفيني اني من ظلـوه المـوده
ومالي مع الخسران بالدين مقعـاد


وإن جتني الغفلة علي اوقات شدة
اصبح لها صداد والقلـب صـداد


وتقدير ربـي مالنـا فـي مـرده
ومعارض لتقديره إشراك والحـاد

[ضـــوء القمـــر]

الجمهــــره

إي بالله أخطوا والخطا اللي جابهم عين الصواب
مبطي وأنا أشوف الطمع يكشف رداهم وأستـره
مايملي عيون الحسود بهالزمـن غيـر التـراب
ومن لايتوب من الخطا تحـرم عليـه المعـذره
اللي من أولهـا خـراب أكيـد تاليهـا خـراب
والبنـدق اللـي ماتثـور فـي هدفهـا تذعـره
ودك اليامن جاتك الغلطه مـن النـاس القـراب
الصاحـب اللـي ماكسبـت محبتـه ماتخسـره
مشكلتي إني ماعرفت أحسب لصدتهـم حسـاب
قلطتهم صدري على ذكـرى قصيـد وحنجـره
صوت ٍ يصول بمنبره واخطاب مامثله خطـاب
والطيبه اللي زعزعت صوت الخطيب ومنبـره
مافيه دمع ٍ صوبـوه أحبابـي بوجهـي وخـاب
ولازرق حزنـي علـى غالـي ولافـج انحـره
كل الزهاب اللي معي ذكرى من أصحاب الزهاب
واللي بقالي من عذاب اشرس طريقي وأخطـره
لأني تجنبت الغرق.. عديت من فـوق السحـاب
لأن أكثر أصحابي ورق..ماشفت للطيب إثمـره
والله ماحطيـت بيـن الحقدوالـخـوه حـجـاب
حتى غدوا ربعي يحدوني على الضيـق أشكـره
البارحه ثـارت علـي رقـاب وأوتنـي رقـاب
البـارحـه ياثـقـل دم الـبـارح ويامحـقـره
أثر المصايب ماتجيك إلا مـن النـاس القـراب
وبهالزمن حتى الخوي اللي تثـق فيـه أحـذره
أهب ياوجه الحسـد وشلـون جمعهـم وغـاب
كيف السنيـن اللـي عطتنـي بعثرتهـم بعثـره
لابارك الله في رفيـق ٍ تزعلـه كلمـة عتـاب
ولاجمـع الله الرجـال اللـي تفرقهـم مــره
الصاحب اللي مايجي من صحبته غيـر العـذاب
نذر ٍ علي إن ماهجرني وإلا أنا اللي ب أهجـره
من يفتح لفرقاي باب أفـك لـه عشريـن بـاب
وأذا خويـي مايقـدر خـوتـي مــا أقــدره
عو ّدت نفسـي كـل ماشـددت لليمّـه ركـاب
مأصد وجهي عـن طمـوح إلا لياجبـت خبـره
أن روّحوا فأنـا بـري منهـم ليـوم الحسـاب
وإن جرحوا قولوا لهم ماحركـوا فـيّ إشعـره
شفهم لهم حول السنه ولا خـذوا منـي جـواب
أحسـن دوا للـي يحـاول يستفـزك تحـقـره
ماكنت أحاتيهم صغيّير ..عـاد أحاتيهـم شبـاب
الصاحب اللي ما أذخره لليوم الأسود ما أذخـره
شفني جمعت أوراقهم بكتاب وأغلقـت الكتـاب
ياوقـت لـم اللـي تلمـه وأنثـر اللـي تنثـره
اللي يخاف من الظما يترك لنا طـرد السـراب
واللي ماهو بقـد الظـلام ووحشتـه لايسهـره
عقب أكتئاب البارحه ماعاد انـا حمـل إكتئـاب
الطيب جرجرني وانا مانـي بناقـص جرجـره
انا تجرعت الظما ليـن أحتـرق وجهـي وذاب
انا كسرت بخاطـري قبـل الصداقـه تكسـره
انا خسرت اللي غيابه غير عـن كـل الغيـاب
انـا غفـرت لعـلام ٍ ماتستـحـق المغـفـره
انا أكثر (أنسان) تعلم من كثر ماأخطـأ وصـاب
انا أخر (لسـان) يتكلـم فـي زمـان الثرثـره
انا القصيد اللي فزع مـن دفتـره مليـون نـاب
وانا الوحيد اللـي جمـع مليـون نـاب بدفتـره
جفني وجرّحه السهر ، حيلي وهدّتـه الصعـاب
دمعي هدر،ضحكي ندر،عمري وضيعت أكثـره
شيـب بعقـول العرب..هيبـت روس ٍ ماتهـاب
جمهرت نـاس ٍ عمرهـم مايعرفـون الجمهـره
ماصرت ذيـب إلا لأن اللـي تحدونـي ذيـاب
ما كنـت أغيـب إلا لأن العفـو عنـد المقـدره
ترى حلاتك لاحملـت لصاحبـك كلمـة عتـاب
أن مانطقـت بهـا بوجهـه ماتذمـه بظـهـره
في هالزمن مايملي عيون الحسـود إلا التـراب
والا الحظيظ.. الطلقه اللـي ماتصيبـه تذعـره
ودك اليامن جاتك الغلطه مـن النـاس القـراب
الصاحـب اللـي ماكسبـت محبتـه ماتخسـره


قــدها وقــدود

أنا ربتني الدنيـا علـى جـزل العطـا والجـود
ونفسي للوفا والطيـب وفعـل الخيـر جزامـه
وأعارض منهج الهابط وأوافق للصعود صعـود
وأسيّـر نفسـي بعقلـي مـدام النفـس هدامـه
ولا تثّر بي البسمـة ولا كحـل العيـون السـود
ولا يقوى على قلبي صغيـر الحسـد وأجسامـه
أردّ الجـود بأمثالـه وأقابـل بالجحـود جحـود
وترى لا خير في رجلٍ يوطّـي للـردى هامـه
وعندي مع أهل العِليا مواثيـق وثـلاث عهـود
أوفـي لـه مطاليبـه وأودّه وأرفـع أعـلامـه
أعايش مركب الدنيا علـى متـن القـدر مولـود
أبعرف هو صحيح إنّ القـدر بالنـاس دوّامـه ؟
ومن وين الزمن مقبل وإلى ويـن الليـال تقـود
ومن في هالزمن يقـدر يوجّـه خطـوة أقدامـه
ومن له بالزمن غاية ومن عنـده هـدف منشـود
ومن منّا قـدر يعـرف خفايـا مقبـل أيامـه ؟
عرفت إنّ الشقا باقي ، عرفت إنّ الحسد موجـود
عرفت إنّ القدر يفرض علينـا بأسـوأ أحكامـه
لقينا بالعرب حاسـد وشفنـا بالعـرب محسـود
وبه ناسٍ لنا ضامـت ، وبـه بالنـاس منظامـه
وينقص بعضنـا خـوّه وينقصنـا وفـاء وعـود
مـدام الحسـد باقـي وبعـض النـاس نمامـه
ولا ترجى بها الدنيا من ربوعك يجيـك اسنـود
ولا تشره علـى رجـلٍ عيونـه خانـت أقدامـه
وقابل خطوة بخطوة وجازي بالصـدود صـدود
تناسى غلطة الصاحب عليك بلحظـة اخصامـه
ولا تخطي ترى لصبر الحليم اليا سـلاك حـدود
تروّى واعرف بضـرب الحديـد تفكـك لحامـه
تجنب كسرة الخاطر ولو حبل الزعـل مشـدود
تراك بكسرة الخاطـر حكمـت القلـب بعدامـه
ولا تزعل على رجلٍ بذل لك ولرضـاك جهـود
ولا تامن من الحاسـد رضـاه ورفعـة ابهامـه
نبي نصبر على الدنيـا قلـوبٍ بالحيـاة زهـود
مدام إنّ البخـت عيّـت توّفـق رمعـة سهامـه
وأنا ما قلتها راجي ولا أطلـب بعدهـا مـردود
ولكـن الفتـى ودّه يحقـق جمـلـة أحـلامـه
وبمشي لآخر الدنيـا ولـو كـلّ الأنـام اقعـود
وعن وجه الزمن بكشف حقيقـه وأرفـع الثامـه
صحيح إني صغير السـن ولكـن قدهـا وقـدود
وأنا عندي مـع الدنيـا مواقـف ترفـع الهامـه
طموحي يملـي العالـم ولابـه للطمـوح قيـود
مدام إن الأمل طبعي ( عرين وصرت ضرغامه )
خلقنا الله من ترابـه ولأحضـان التـراب نعـود
تحت رمل الثرى نبقـى تغطـي جسمنـا خامـه
سلفنا ما لحقناهـم تحـت قـاع التـراب رقـود
ولا يبقي من الميـت سـوى ذكـراه وعظامـه
ولو طال العمر فاني وترى عمر الفتـى محـدود
وكـلٍ يطلـب المولـى يبيحـه يحسـن ختامـه
وأنـا بلّغـت بلسانـي وربـي والأنـام شهـود
وصحف البيّنة جفّـت وعنهـا رفعـت أقلامـه


خطـــاكـ الســــوء

لأن الدمع ما يسخي عطـاه إلا علـى الأحبـاب
ترى ما للهدب دمـع صـدوق إلا مـع أحبابـه


ومدام أن الدموع أصدق تعابير الحـزن بأهـداب
حرام أن الدمـوع تجـف طليلـة فتـرة غيابـه


هذاك اللي شعل شمعة ضوت كل الـدروب وذاب
فقد رمل الوطن دوسـة قدمـه وعطـر ترحابـه


فقده من الثرى ضيق وتراحيب وسهل وهضـاب
فقده من الوطـن حتـى عذوبـة مـاه واعشابـه


يغيبه المـرض عنـا وكنـه بيننـا مـا غـاب
بعيد وشعبه الوافـي عليـه أقـرب مـن ثيابـه


سكن باهدابنا حتى يلامـس رعشـة الأعصـاب
فـرش بدروبنـا قلبـه ولـف الشعـب بأهدابـه


تضيق ابنا الدروب ونرتجي في وجهه الترحـاب
حشـا كـن الشـوارع ماتمـر إلا علـى بابـه


من أول ما حكم وأسس ومسس للثبـات أطنـاب
سجـد قلبـه علـى ملـة رسـول الله وكتـابـه


غرس فينا الوفا نبتـه مثـل ماتنبـت الأعشـاب
وقال إن الثرى له حق نشقـى لـه ونشقـى بـه


وطن ما به وطن غيره....ولا غير التراب تراب
مـادام الله خلـق دون البـلاد سبـاع وذيـابـه


عرفت أنه يهاب أنه يهاب ومـا يعـرف يهـاب
يحفظ الـدار يـوم الجـار ثـار وكشـر انيابـه


وقف للعالـم بأسـره وقـوف الفاقـد الطـلاب
خطب خطبـة شجـاع وفـزز التأييـد بخطابـه


عتق دمعة فرح تلبـس لميعـاد الرجـوع ثيـاب
حشا كن الدموع تعـرف علـم الغيـب واسبابـه


خطاك السو وعيون الحسـود وهرجـة الكـذاب
وتعدتـك المنايـا يـا ظـلال الشعـب وحجابـه


فبعدك يا طويل العمر يبقـون القـراب أغـراب
وترى يا شيخ ما كـل القلـوب البيـض تتشابـه


يقولون الغلا واحد وأنا قايـل: شجـاب لجـاب؟
هذاك الشيخ جابر غير..ذاك الشيخـه أولـى بـه


هذاك اللي فقـد لـذة منامـه لأصغـر الأسبـاب
هذاك يموت ما خيـب هقـاوي مـن تهقـوا بـه


هذاك إن لد للعذرا تغطرف لـه ولـع وإعجـاب
هذاك اللي أسر عشـق القلـوب بطـرف سبابـه


هذاك اللي من أفعاله عجز في مثلـه الا نجـاب
كأن الله منع بعـده يجـي شخـص يتحلـى بـه


هو اللي شتت جموع الضياع وولـف الأحـزاب
هو اللـي جفـف دمـوع اليتيـم ويتـم صوابـه


هو أول من حما شعبه من طعون الزمن وأ نصاب
هو اول من نذر نفسـه يـرد الحـق لاصحابـه


كأن الله خلق بينـه وبيـن المستحيـل أحجـاب
فلا يعرف محال إلا يكون أسهـل مـن صعابـه


أبو مبارك تطامن لـه خشـوم وتفتديـه رقـاب
عريب إن ما زها بالمجد كـان المجـد يزهابـه


ودام الله خلـق فينـا جماعـات وأمـم وأنسـاب
أبي هو بالجود انساب خلق أكـرم مـن أنسابـه؟


تحلى بالصبر يا شعب......لا تحزن ولا ترتـاب
ترى شعب الكويت أكبر مـن ان الشـك ينتابـه


وعساكم أن تحبوا شيء كرها يـا ألـو الألبـاب
وعسى أن تكرهوا شـيء وهـو خيـر لطلابـه


نبي نصبر على كربه ولـو أن الصبـر غـلاب
عزانـا للبـلاد أنـه بيحيـا لـه ويحيـا بــه


ومثل ما قد سجد بأرضه لوجه البـاري التـواب
بعـون الله بيرجـع لـه وبيسجـد علـى ترابـه


وتطير من الفرح بسم السلام من الحمام أسـراب
بعدها تكتمـل فرحـة رجـوع الشيـخ الأحبابـه


وعسى رب السما يفتح لدعوات القلـوب أبـواب
وتكون أصدق دعـاوى شعبـه ملبـاه ومجابـه


ولأن الدمع ما يسخي عطـاه إلا علـى الأحبـاب
حرام أن الدمـوع تجـف طليلـة فتـرة غيابـه

[ضـــوء القمـــر]

الثـــــريا

ليـه تطعنـي وانـا ميـت بليـا
ماكفاك الي حصلّي قبـل ساعـه


كن بين همومـي وبينـك حميـا
جيتكم واحـد وجيتونـي جماعـه


انت منا والمصايـب مـن هنيـا
كلكم ضدي ترى ماهـي شجاعـه


ما ابشع من جروح طعنات القفيـا
غير سكيـنٍ تصيـب بهالبشاعـه


لاتتـوب ولاتـذوب ولا تـريـا
جرحها جرح وفظاعتهـا فظاعـه


ترتوي من فيـض دمـي والتفيـا
وصار قلبي مثل اخوها بالرضاعه


وانت ليل لـو ضويتـه مايضيّـا
ضعت فيه وشفت نفسي في ضياعه


اتهيـا ويـن مـا اشوفـه تهيـا
وارسي بمرساه وشراعي شراعـه


مـن عرفتـه والمحيـا بالمحيـا
ومايروح الا ذراعي فـي ذراعـه


ان رضيت ارضيه وان عييت عيا
وان طلبني قلت له سمع وطاعـه


ما عشقت من النجوم إلا ((الثريا))
وماملكت من الكنـوز إلا القناعـه


وانت وجيوش المـوادع والجفيـا
كيف اوقف ضدكم وانتم جماعـه


لوبجيكـم بالشجاعـه والحمـيـا
البلا ان الكثره تغلـب الشجاعـه


المبـــــاني

جابك الله من غياب ٍ ضيّق صـدور المبانـي
قبل لا الوحشه تزعزع بيتك الصلـب وتبيـده


بيتك اللي من رحلت وكـل جدرانـه تعانـي
ماتحمـل ينتظـر شهريـن وعيونـك بعيـده


الله العالـم لـو إنـك جيـت متأخـر ثوانـي
ماتشوف إلا بقايا مـن حصـاه ومـن حديـده


من عرفتك وأنت تايه من مواني لـي موانـي
وتارك ٍ قلبي مولّع مـن وقيـده فـي وقيـده


ضاعـت سنينـي أحـد بهاليالـي وتحدانـي
وأنت ماتشبع غيـاب ولاتخـاف مـن النقيـده


ودي أتحمـد لـك الله بالسلامـه , مامدانـي
كل ماتوصل برحلـه ترجـع برحلـه جديـده


دام تدري كل وجـه ٍ غيـر وجـه الله فانـي
ياخي أكسبلك ثواب وخاف ربـك فـي عبيـده


كان فيني عيـب قلي:فينـي العيـب الفلانـي
كان هرجي مزعلـك فـي شـي قلي:لاتعيـده


عيب تصغر في عيوني وأنت برقاب الغوانـي
كيف تستسهل طعوني وأنت خابرني وليـده ؟


لعنبوك أن مت بيدك من يفكك من أخوانـي ؟
لحزنوا ربعي على فرقاي شاللـي تستفيـده ؟


أنت منت اللي عشقته أنت أكيد انسـان ثانـي
ليه صرت بهالبرود وبهالاحاسيـس البليـده ؟


وين حبك للزعـل .ويـن العنـاد الأولانـي ؟
وين حنّية زمان وفرحـة العمـر الرغيـده ؟


وين ذاك اللي اليا أقبـل مايبـات إلا بمأنـي ؟
وين راح اللي اليا أقفى مايـروح ألا فقيـده ؟


واحد ٍ من جابـه الله بـس يامـر ويعصانـي
الوحيد اللي أخافه غصب وأمشي معـه سيـده


(مابغيت أطيـح بيـده) ليـن ماربـي بلانـي
ولا أنا لو هي بكيفي (مابغيـت أطيـح بيـده)


ذاك بس اللـي يامـن جيتـه يلخبـط كيانـي
اللي بنظـره ينشـف دم قلبـي فـي وريـده


قبل أشوفه أجمع اله أحلى القصايـد والمعانـي
وأن لقيته ماعرفت أقـول لـي جملـه مفيـده


الف مره قبلـه أعـد القصيـده مـن لسانـي
ولعنبوه أن جيت عنده قمت أخربط بالقصيـده


أمدحه وأنا أدري أنـه لـو تباطانـي نسانـي
أنطحه وانا أعرفه مجنـون وأفكـاره عنيـده


من يسوي بي سواتك يالرهيـف الاسمرانـي ؟
منهو من الناس غيرك غلطته ترفع رصيـده ؟


من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟


ان تبعتك .أتبعك من طيبـي وواسـع بطانـي
ولا أنا لاجيـت أكيـد انسـان عـزالله بكيـده


أقدر أنزع لك ثيابـي وألبـس ثيـاب الأنانـي
وأقدر أطلع من عذابي والعب بدورك وأجيـده


ومستعد أكسب رهاني لو بغيت أكسب رهانـي
وأخدعك بحساس كاذب وأتحدى مـن يصيـده


أبك أنا لي شفت خلّي حط غيري فـي مكانـي
والله إني لتركه وأن صد لعشـق سيـد سيـده


جيت مابيك تحقرني جيت أبيـك تعـز شانـي
جيت أبي فزعة ظلوعك من مشاعرك البليـده


خلني داخل (حدودك) وأجبر بخاطـر زمانـي
أكذب بباقي (وعودك) وأصدق بلحظه سعيـده


أنتشلني من (بـرودك) لـو تولّـع بالمحانـي
عطني أحساس (بوجودك) وأخذ كل اللي تريـد


تكفى واليا قلت :تكفى بيع خلـق الله عشانـي
لاتضيّع من يدينـي فرصـة العمـر الوحيـده


يعلم الله شفت منـك ومـن غيابـك ماكفانـي
كان ماتقـدر تخفـف هـم قلبـي !! لاتزيـده


شف غيابك وش يسوي بالصـدور وبالمبانـي
وأنت تدري كيف كانت صدمت غيابك شديـده


والله أنك لو وصلـت البيـت متأخـر ثوانـي
مالقيت إلا بقايـا مـن حصـاه ومـن حديـده


السفيــــنة

ضاقت وساع الفيافي والوعد متن السفينـة
للطريق اللي دعاني بعد أمـان الله وأمانـه


لا تنادينـي وصونـي قلبـك الله لا يهينـة
لا يراهن في رجوعي لجل مايخصر رهانه


ليه مرحل عن غرامك بعدما ذقت الغبينـة
أذكر لي شيء واحد يستحق أقعـد عشانـه


الهـوى الغـدار حـد الله مابينـي وبينـة
والرجل لاخير فيه إن ماحفظ قدره وصانـه


يوم قلبي ماعصـاك ولاقدرتـي تذبحينـة
ليه خنتي فيه وأنتي معه من نفـس الديانـه


كان ذبحي بيدك أرحملي من اللي تفعلينـة
وإن طلبتـك تذبحينـي ماذبحتينـي لعانـه


كل جرح من جروحي تذكرينـه تنكرينـه
كن مالك في نزيفـه يـد خانـت بالأمانـه


ينزف الخافق تواضع لين لطختـي جبينـه
وإلي أنا ماكنت أبيها توصل حـد الأهانـه


قلت من باب الميانـه صاحبـك وتعذبينـه
لعن أبوك أرخي شـوي ماصـارت ميانـه


طعت عقلك يوم قيل إن العقل بالبنت زينـة
لكن الشره علي إن كنت أحسب إنك تكانـه


من بعد ماكنتي أنتي في حشاي أغلي سجينه
بوعدك أبطلق صراحك وأتهمنـي بالأدانـه


كيف أبنسي ربي اللي ملهم القلب السكينـة
مثل ماعانه بقـرك لانـوي فرقـاك عانـه


مزعل لأجلك البندري رجت عقول رزينـة
وإن تهادت بالطريق الجرهدي تزهر جنانه


كانت أول من تحكم في فـروع الياسمينـة
وإن تعدتهـن تثنـن خيزرانـه خيزرانـه


بعتها لأجلك وصارت لأصغر طرافك رهينة
وإلي هي لفتت هدبها تغمرك ثقل ورزانـه


ماقتنعت أن الخيانه للرجـل تلـوي يمينـه
لين ربـي بعثـك وذقـت طعـم الخيانـه


أسمحيلي مابقـي فينـي مكـان تطعنينـه
وأقبلي من جوف قلبي كل عطفه وأمتنانـه


والله الله في عذابك بتركـك عينـك بعينـه
دلليه ولايـرده عـن شقـاك إلـي لسانـه


وإلي أنا قررت أسافر وأمتطي ظهر السفينه
لأن مابه شيء واحد يستحق أقعـد عشانـه

[شُموخيـﮯ يكسرﮒ]

مشكوره يا ذوووق

ترا كل قصائده روووووعه ..

احسنتي الاختيار

دمتي بخير

[صالح الشريف]

اختيار رائع جدا


صح لسان ابو زيد


وسلمت يد من نقل


تحياتي ضوء القمر

[ضـــوء القمـــر]

كأن الي خلق حسنك خلقني مع جسـدك ظـلال
وصرت اقرب جسد يمشي معك باقفاك واقبالـك
ابي قلبـك يحـس انـه فقـد بمحبتـه رجـال
ملكته من هدب عين وخسرت ارضـاه باهمالـك
صحيح ان الفراق اقسى ولكن الوصـال محـال
وانا صعب على ارضي غرورك واضعف قبالـك
بعد مـا حققـت عينـي فبعـدك للرقـاد امـال
اعـود للسهـر! ياخـوي فـال الله ولا فـالـك


بصراحه أحب هالابيات تمثل جزء كبير من كيان أشخاص ..

شواااااقه الذوووق ذوقكـِ ياذواقه لولا ذوقكـ ماعرفتي الحلو من الحامض أقصد اللي ماله معنى

تسلمي ع المرور .. ماعدمناكـِ

أختكـِ ‘ ضـــــوء القمـــــر

[ضـــوء القمـــر]

وسلمت يداكـ صالح ع هالكلمات .. ماعدمت هالمرور ..

ضـــــوء القمـــــر

[حورالعين]

جميل يالأخت

وانا عن نفسي احب أشعار الشاعر حامد زيد


تسلمي على النقل الموفق والرائع

[ضـــوء القمـــر]

الله يعافيكـِ الغاليه .. تسلمي ع المرور ..

أختكـِ ‘ ضـــــوء القمـــــر

[الوالي]

السلام عليكم ورحمة الله وبركاته



ألف شكر لك أختي ضوء القمر



الله يسلمك ويعافيك

[ضـــوء القمـــر]

ويعافيكـ ويسلكـ ربي الوالي

أختكـ ‘ ضـــــوء القمـــــر

[اسيرالغرام]

مشكوره يا ذوووق
اختيار رائع جدا
ترا كل قصائده روووووعه ..

[ضـــوء القمـــر]

هلا وغلا أخوي أسير تواجدكـ الأروع .. أكيد أنا أحب أسمع له .. ماعدمتكـ

أختكـ ‘ ضـــــوء القمـــــر

[العرندس]

انـا غفـرت لعـالم ٍ ماتستـحـق المغـفـره
انا أكثر (أنسان) تعلم من كثر ماأخطأ وصـاب
انا أخر (لسـان) يتكلـم فـي زمـان الثرثـره
انا القصيد اللي فزع من دفتـره مليـون نـاب
وانا الوحيد اللي جمـع مليـون نـاب بدفتـره
.....................
ضوء القمر ............ نقل رائع لشاعر رائع
تستحقين عليه كل التقدير الرائع

[ضـــوء القمـــر]

وتستحق تقديري ع مروركـ الكريم العرندس .. لا تحرمنا طلتكـ .. ماعدمناكـ

أختكـ ‘ ضـــــوء القمـــــر