بعدك عذاب القلب

سر ياقلم واكتب من الشعر مالاق
ابيوت شعر بالقوافي فريده

يومك هجرت الشعر واحرقت والاوراق
وقلت الوداع لابغيت النقيده

اكتب ترا فالقلب زادن الاشواق
والهجر ولع في خفوقي وقيده


من عقب ماكنا حبايب وعشاق
ولوصالنا نلبس ثياب جديده

حان الفراق الي دوا وسط الاعماق
والقلب ذاب من المفارق وريده

والكون في وجهي بعد ماتسع ضاق
والعين بير الدمع تنضح مزيده

بعدك عذاب القلب ياشمس الاشراق
ومواصلك يجعل حياتي سعيده

روحي ترا بعدك مثل كسرة الساق
ومشاعري يمك تراها عنيده