الاجواء الرمضانية أجبرتني اتذكر مواقف رائعة عشناها في طفولتنا في هالشهر الفضيل
كنا لما يقولوا بكرة رمضان نشوف حريم الحارة يروحن البيوت القريبة يتعذرن من اهلها ويباركولهم بالشهر..والابتسامة تملأ وجوههم الطاهرة..
أذكر قبل لا يأذن المغرب امي تطرشنا بيوت الجيران نودي لقيمات ولوبيا ومن اللي مسوينه..
والجيران هذا حالهم كل من طبخ شي وداه لجاره..يالله حلاة ذيك الايام الواحد يتذكرها ويحزن على الحال اللي هو فيها..
أتذكر بعد حريم الحارة اول ما يأذن العشا شلن شلولهن وراحن المسجد يصلن التراويح ورى الامام عاد الله يعين على صلاتهن حريم من يتولفن لازم حش في الخلق ما يرومن يصبرن
واتذكر اخواني بعد صلاة التراويح يروحوا الملعب يلعبوا لين الساعة 1 بالليل وطبعا نطرشهم يجيبولنا مشاكيك معهم..
والشي الحلو اللي ما انساه..بحكم ان في رمضان الليل يصير كانه نهار يعني رمسات وسوالف كانن عجايز الحارة يتجمعن في بيتنا ع الساعة 10 تقريبا ونجلس حواليهن نسمع قصص ايام زمان ايام الكفاح والتعب وكيف كان رمضان على ايامهم وكانوا يحكولنا عن المسحر اللي يصحي الناس للسحور سمعنا منهم قصص حلوة كثيرر وممتعة..
هالاجواء يمكن للحين موجودة في البلد بس للأسف مسقط معدومة من هالمظاهر الطيبة اللي تحسس الواحد انه صدق في شهر كريم ..شهر صلة الرحم فيه تكثر مو شهر نوم ومسلسلات!!
هذي صفحة من صفحاتي اللي احن لها كل يوم واتمنى لو ترجع هالايام الحلوة بطيبها
مواقع النشر (المفضلة)