يوميا العجوز موزة والشايب خلفان

**رفيــــعـــهـ الشــــآآآآن** · 19-01-10 06:01 PM

افا زعلت منج يوم يومياتش وانتي والشايب ؟!

**عاشقة السلطنة** · 19-01-10 07:21 PM

أفاااااااااااااااا يابنتي زعلانة من حبوتش ما يهمش بنتي ترجييني باكر بتجيش الخروفة الغاوية

**عاشقة السلطنة** · 20-01-10 11:22 PM

كانت بداية قصتي,,,وبداية الخطب الجلل

أنّي جلست بغرفتي,,,حيرى يحاصرني الملل

كفّي على خدي وقد,,,شخصت من الهم المقل

والشعر بين أصابعي,,,في كفي الأخرى انسدل

كان الفراغ مخيما حولي ,,,يراقب في وجل

أمي تجاهد اخوتي,,,وأبي تشاغل في العمل

الكل يجري في مصالحه,,وقد غفل الأهل

السلام عليكم عيالي كيف حالكم؟..شي علوم؟شي خبر؟

سمحولي غبت عليكم بس الشايب محموم وما قدرت اخليه علين استوى بخير

واليوم جيت أخبر عن السالفة بو استوت بيت جيرانا الله يستر عليهم

الله يسلمكم ذاك اليوم جاراتنا جايات يزورن الشيبة سمعن عنه انه محموم

وعاد خبرني بسالفة البنية اللي فضحت اهلها الله يهديها والسبة هالترترنت

اللي بنات اليوم راقدات فيه والاهل ياغافلين لكم الله..((ما كل البنات

))

ما خلين كلمة ما قالنها عن البنت وأهلها استوت فضيحتهم على كل لسان..

وانا تراني عارفتنهن هالحريم ما عندهن شغلة غير ينقلن الخراريف الشينة عن الأوادم

..وحدي ما صدقتهن لان البنت الله يسلمكم متربية وما يطلع صوتها كلنا نحبها واهلها واثقين فيها..!!!

المهم انا سرت عند ام البنت عشان اعرف السالفة ومو مستوي,,,تعرفوا العجايز ما يهجيهن ما يعرفن بو يدور حولهن

وصلت عند جارتنا زوينه لقيتها حاطة يدينها على راسها وتصيح..

قلتلها خير زوينة مو حالّ عليش اختي؟!!,,حد من عيالش فيه شيء؟

قالتلي يختي يوووووموزة البنت فضحتنا وين نودي وجهنا من الناس؟اخوانها ما قادرين يجلسوا في البلد وابوها المسجد ما قام يروحله؟!!

قلتلها بعيييييييد الشر كيه مو مستوي؟!!مو سوت البنية؟

قالتلي سويروه عندش روحي شوفيها اخوانها كسرولها عظمانها وأبوها بغي يموت علينا وحمّود بغي يقتلها لو ما مسكناه عنها!!!

انا كنت عارفة السالفة لكن فكرتها كذبة..رحت حجرة سويرة لقيتها طايحة في الأرض وتصيح ووجهها كلة دم ومزرقّ..أول ما شافتني جاتني بسرعة و قالتلي امي موزة لحقيني بيقتلوني وتشهق من كثر الصياح

وحدي فزعت على البنية تو بتموت وهذيلا اخوانها ما عندهم تفاهم ما فكروا يتاكدوا من الخبر

...

رحت جبتلها ماي تشربة وخلاف قلتلها يابنتي انا مثل امش خبريني مو صار؟

هيش اللي يخلي أمش وابوش واخوانش يتمنيوا موتش بعد ما كنتي نظر عينهم؟!!!

سويرة ما تحملت وجلست تصيح حسيت روحها بتطلع قلتلها يابنتي ما زين بو تسوييه ف عمرش..خبريني يمكن اقدر أساعدش..

بعد ما صارت البنت اهدا شوية قالتلي امي موزة انا بخبرش بالسالفة من اولها

يالله عاد اباكم تسمعوا السالفة ياعيالي وتحطوها في عقلكم وتفهموها زيــــــــــــن

((ياحبوتي الله يشهد علي اني احب أهلي واموووت في تراب رجولهم وما يهون علي اني اكون سبب في تدميرهم وتنزيل راسهم في الطين

..ياامي انا اهلي ما عمرهم سألوني من ربيعاتش ولا اهتموا يعرفوا عنهن شيء!!!

مع انه المثل يقول (قل لي من تصاحب أقل لك من تكون))!!

..النت عندي 24 ساعة اخواني طول وقتهم سفر والا مع ربعهم..أمي مع جاراتها ليل نهار

أبوي والا شغل والا مع ربعه..وأنا..ما عندي خوات أشكيلهم همومي!!..

دخلت المنتدى...عشان أتعرف ع البنات حبيتهم كلهم بنات وشباب

..((هنا انا فتنت عليها قلت لها تو مو هذا المنتدى نوبة بيكون مثل كالفور رايحة تقابليلي جرابيع!!!

)..قالتلي لا ماه هذا في الانترنت يعني ماحد يعرف من يكون الشخص الثاني((يعني كماي انا واياكم لكن انتوه تعرفوني وتعرفوا شيبتي

))

المهم ياحبوه بعد فترة من دخولي المنتدى كان فيه واحد من الشباب في المنتدى الكل يحبه ويحترمة..رسللي ع الخاص أول شيء كان يكلمني عادي يعني مثلا اخبارك؟كيف الدراسة؟

بعد بعد فترة طلب مني اعطيه اضيفة ع المسن

..أنا في البداية رفضت بس هو قال عادي اعتبريني مثل اخوك واكيد ما بضرك واذا تضايقتي مني حذفي ا***** !!!أنا الفكرة عجبتني وقلت ما خسرانة شيء

..بديت اكلمه ع المسن وكانت سوالفنا عادية كان يذكرن بوقت الصلاة اذا ما انتبهت

..حسيته ملتزم وفي يوم قالي ما ملاحظة شيء؟

قلتله شيء مثل ايش؟

...قالي نحن متى نعرف بعض بس ما اعرف ولا معلومة عنك

..!!!في البداية ترددت بس بعدين قلتله اوكي مو مشكلة انا واثقة فيك وبخبرك عني كل شيء!!!!...

وفعلا عطيته كل المعلومات اللي طلبها اسمي ووين أدرس..وين أسكن...الخ

المهم مع مرور الوقت تعلقت فيه بشكل كبير صرت ما اتخيل يمر علي يوم بدون ما اكلمه ع المسن!!

..وفي يوم قالي ياسارة انا بقولك بس أتمنى ما تفهميني غلط..انا ياسارة احبك

..انت صرتي كل شيء في حياتي..انتي مثل الهوى اللي أتنفسه..

لحظتها حسيت نفسي طايرة من الفرحة..يعني حتى هو يحبني..حتى هو ما يستغني عني...

رديت عليه وقلتله نفس الشعور اللي أحس فيه..

قالي حبيبتي..ممكن أشوف صورتك عشان اكحل عيني بجمالك؟!!

قلتله سوري ما اقدر..قالي يعني انتي ما واثقة بنفسك وبجمالك؟

قلتله واثقة ونص وبكل غبـــــــــاء الدنيا راويته صورتي..

ما خلى كلمة غزل ما قالها عني وما خلى كلمة مدح تعتب عليه!!!

المهم صرنا 24 ساعة ع المسن سوالف وغزل اليوم اللي ما يدخل فيه احس نفسي بموت ..فاقدة شيء كبير!!!

وفي يوم صدمني بطلب غريب...طلب مني رقم تلفوني عشان نعرف بعض أكثر وما يفرق بينا شيء لنه يحبني ويريد يتعرف علي عن قرب وفي النهاية نتزوج!!!!

أنا اقتنعت بالفكرة وعطيته رقمي..ما كذّب خبر فورا اتصل وانا رديت

..حسيت نفسي في عالم ثاني ..أول مرة أكلمة..هذا حبيبي..حياتي وعمري..ملكي أنا وبـــــــــــــــــس!!!

ومرت الأيام وانا وحبيبي ع التلفون طول الوقت..تأخر مستواي الدراسي كثييير

..رسبت في كذا مادة بس قلت عادي مو مشكلة دام حبيب القلب معاي!!!

وأهلي خبر خيييييييير ما يعرفوا عني أي شيء غير يسلمون مصروفي اليومي!!!

وفي يوم طلب مني انّا نتلاقى!!!!!!!

قلتله كيـــــــــــــــــــــــف ؟!!

انت ايش تقول؟!!....قال انتي ما تحبيني؟!!..ما عندك ثقة فيني؟!!

قلتله ايوا بس.........

قالي شوفي فكري زين وأنا البنت اللي ما تثق فيني مالها لزمة عندي!!!!!!

كيف بنكون اسرة واحنا ما بينا ثقة!!!

خلاص انسيني واذا رجعتي لعقلك رقمي تدليه!!!

أنا حسيت نفسي بجن...كيف يقول أنساه وهو حياتي

..كيف اتركة وهو نبض قلبي!!!

..مرت أيام وليالي عيني ما تعرف النوم من كثر التفكير!!!

وفي الأخير قررت اوافق..أنا كم يوم ما استحملت فراقه كيف لو يبعد عني العمر كلّة!!!...

يتبع.........

**عاشقة السلطنة** · 20-01-10 11:43 PM

وفعلا رسلتله مسج وخبرته اني موافقة

..على طوووووووول اتصل وكان فرحااااااااان

...!!!قالي كنت متأكد اني ما اهون عليك..ياحياتي وعمري وقلبي...........الخ

من كلام الغزل اللي حافظينه!!!

اتفقت معه اني أشوفه في شارع الحب

..بالليل..كانوا أهلي طالعين وأنا خبرت أمي اني بروح عند ربيعتي قالت ما مشكلة روحي بس لاتتأخري!!!

حتى ما فكرت تسألني من صديقتك هذي اللي بتروحيلها بالليل!!!

رحت عند السواق اللي وصلني عند واحد من البيوت القريبة من الشاطئ قلتله هذا مكان بيت صديقتي!!!

...واتصلت بحبيبي يجيني..ما كذب خبر على طول جاني والضحكة شاقة الوجه

...أنا استحيت أول مرة أركب معه

..يانااااس هذا حبيبي

..أنا واياه بروحنا ما يفصل بينا شيء..!!كنت حاسة نفسي بحلم ما أريد أصحى منه.

..ركبت معه ورحنا الشاطئ مكان بعيد شوي عن الناس...مسك ايدي وسمعن كم قصيدة غزل حسيت نفسي ذايبة من الحب..!!!

وفجأة قالي ايش رايك نتمشى بالسيارة انا ما عارضت

..ووقف قدام بناية سكنية طبعا بعد ما خدرني بكلام الحب..والغزل..والقبلات......الخ

نزلت معاه مثل المسحورة ما كنت حاسة بشيء غير اني مع حبيبي اللي أأمنه على حياتي!!!

وطبعا يا أمي موزة بنت تدخل مع شاب في شقة أكييييييييد بتصير الكارثة والبنت بتدفع أغلى كنز عندها....شرفها..

بعد ما صحيت على نفسي وانتبهت ع اللي صار...بكيت بس بعد ايش!!!

خلاص ما عاد ينفع البكاء..اللي ضاع ما يتصلح..!!!!

بس الذئب ما انتهت مهمته..قالي انتي من ايش خايفة حياتي؟!!

هذا انا سامي حبيبك !!لا تفكري اني ممكن أتخلّى عنك..!!

حسيت بالراحة لكن من داخل كنت محطمة!!!!

رجعت المكان اللي نزلني فيه السايق واتصلت فيه عشان يوديني البيت

..رجعت البيت بس مافي أحد سألني وين كنتي!!!

...مع اني راجعة الساعة 12 بالليل أمي قالت سارة ليش تأخرتي؟قلتلها نسينا روحنا بالسوالف..قالتلي اوكي حبيبتي روحي ارتاحي!!!!!!!!!!!!!!!!!!

بالذمة امي موزة هذا صح؟!!

المهم ثاني يوم اتصل فيني سامي وقالي اريدك تجييني الشقة اليوم وبدون نقاش!!!!

الشــــــــــــــقة؟!!مستحــــــــــــــــــــــــ ـــيل!!

قالي سمعيني ترى صورك مال ليلة امس كلها عندي وبالفيديو بعد ولو ما مصدقة تراني برسللك اياهم ع البيت عشان تتأكدي!!!

سكرت التليفون في وجهه....ايش يريد الحقير بعد كل اللي سواه..

صحيت ع الغش اللي كنت عايشة فيه...بس بعد أيـــــــــــــــــــــــــش؟!!

العصر دق الجرس جاتني الشغالة عطتني ظرف فتحته انصدمت باللي داخلة

...كانت صوري وأنا معاه في السيارة..ع الشاطئ..في الشقة..في غرفة النوم...كيــــــــــــــــــــــــــــف؟؟متـــــــ ـــــــــــــــــــــــــى؟؟من اللي صورنا؟!!

بس هالأنذال ما بعيده عليهم يسووا أي شيء..

قلت ما عليه بينسى..طنشته..قفلت تلفوني عشان ما يتصل وما أرد عليه

ما كنت حاسبة حساب للي بيصيرلي....ما كنت عارفة ان النذل بينشر صوري عن طريق البلوتوث!!!

...وصارت فضيحتي منتشرة بين كل الناس ووصل عند أخواني وأهلي

...يا امي موزة ما عليه يريدوا يذبحوني راضية بس ما يتجاهلوني!!!!

وردت تصيح لين بغت تطلع روحها..!!!!!

))

أنا بعد ما سمعت اللي سمعته..دار راسي وقلتلها يا بنتي دعيي ربش وصلي وقريي القرآن..واوصيش بقيام الليل يابنتي وربش ما بينساش

...رحت عند امها ولقيتلكم الام على حالتها تون وتصيح..قلتلها بعده لش وجه تصيحي

انتي السبب في كل اللي صار حال بنتش..تو عااد عرفتيها وينش عنها أول والا من يطيح الفاس ف الراس نقول ياريت اللي صار ما كان!!!!

انا طلعت من بيت زوينة وأدعي ان الله يحمي سارة وأمثال سارة..ويهدي شبابنا وينتقم من اللي عايشين بس عشان يفضحوا بنات الناس

...تو انتوا ما عندكم خوات ناسيين ان الرسول يقول فيما معناه ((يابن آدم افعل ما شئت فكما تدين تدان))

.. ما عليه سوي اللحين اللي تريده وبكره بتلقاه في خواتك

يالله يا عيالي سمحولي بروح أشوف شيبتي

ترجيوني في خرّوفة جديدة

حبوتكم موزة

**ملآمح أمل** · 21-01-10 10:18 AM

يــآلله حبووة آنتي روووعة ,,,,كثيرة هآلسـآلفة فأيـآمنـآ وآلمشكلة يضكوآ ع آلبنـآت آلمرآهقـآت إللي عقلهن بعدهن مـآ آكتملت ,,

مــــــــــــآ عندي تعليق ,,, كفيتي ووفيتي ..

وآلله يستر بنـآت آلمسلمين ويهدي ,, آلشبـآب إللي مثل هذوله ..~}

**عاشقة السلطنة** · 21-01-10 10:44 AM

هيه والله بنتي الله يستر عليكن ان شاء الله ويحميكن من الحيوانات

**رفيــــعـــهـ الشــــآآآآن** · 22-01-10 05:33 PM

هذا واقع الحياة حبوتي
وحتى تو لمن نسمع هالسوالف ما نتاثر كثير
لان تعودنا عليهم هالسوالف

ننتظر جديدك

**عاشقة السلطنة** · 22-01-10 11:19 PM

السلام عليكم..كيف حالكم عيالي؟عساكم بخير؟

اليوم ياعيالي بخبركم عن الفشار بو حالّ على بناتنا وشبابنا

..الواحد ساكن في بيت عربي ويخرط على ربعه أوين ساكن في القرم في قصر

..وعنده شغّالات و..و...والفقارى مصدقين وعااااد يوم يقولوا بيجيوا معه يتوهق..!!!

لااااااااا فوشر..يالله ذوقيه أشوف

ذاك اليوم انا والشايب خلفان قلنا حال ولدي جموع يودينا بيت عمته سعاده..الولد اول شيء ما طاع لأن بنت عمه رفضته يوم خطبها..عوين وااااااااااع انا أتزوج واحد اسمه جمعة..هيش بقول حال ربيعاتي زوجي اسمه جمعان!!!

..عاد من زين اسمها أحيدها يقولولها يوم صغيرونه فتوح ام كشة!!!

ما علينا منها..المهم انا قلتله ياولدي ما عليك من فتّوح خليها عنك وجلسنا فوق راسه علين وافق..يوم وصلنا البيت جموع سلّم على عمته وتوكل عند ربعه..وأنا والشايب جلسنا معهم..بعد شوية جاتنا بنتهم فتّوح يووووم تشوفوها تقولوا بنت شيوخ عايشة في قصر ما بيت كحيان حجرتين وحمام وصالة..

يترجيوه يطيح

..يوم تسلّم من طرف صبوعها كنها باغية تولّع شخط ((شخط يعني كبريت للتوضيح

))ويوم تتكلم تحيس ثمها حيس

وااااااااااغشي عليها وااااغشي أسميه خالها خلفان بغي يكفخها..قالها مو حالّ عليش بنتي فيش صولان والا شي

تخرفي سيدة كما الأوادم..

عوين عصّبت قالته خالي انا أتكلم عادي ما فيني شي وبعدها تحيس ثمها

..قالتلها امها سيري داخل((عن تكبر السالفة بينها وبين شيبتي))..

المهم الشايب راح شوية عند ربعة وانا جلست مع سعادة وجلست معنا فتّوح الحلطة

..وذيك الفعلة اللي فاعلتنها بوجهها وذاك الجبل بومخلتنه فراسها

قلتلها سعادة اختي انتيه مغيبة زيلة

كان تراش بتلقييها ف راس بنتش

قالتلي خالتي هذي الموضة

..قلتلها بنتي تو انا بسألش انتنه كيف قادرات تشلن راسكن نحنه بعقيصنا الصغيرون ونحسّة مثقل علينا بعده!!!

المهم البنية قالت حال امها عوين ربيعاتي بيجين معي وانا قلتلهن نتلاقى في الحديقة احسن اريد ابوي يوديني واريده يعطيني 20 ريال يعني ما حلوة اروح وما عندي فلوس

..قلتلها وحال موه ما تخليي ربيعاتش يجين حيّاهن الله حال موه الفشار ابوش زين منه محصل يجيبلكم اكل ويلحق على طلباتكم اللي ما تخلص!!

..ما نشوفلكم غير البنية مشوطه وحالتها حاله عوين هين تريدوني أجيبهن في هالخربة اللي عايشين فيها

..والا اعرّفهن على امي اللي شوفي كيف ملابسها والا ريحتها اللي طول الوقت ريحة مطبخ

والا حارتنا اللي تشرّف؟؟

ربيعاتي عايشات في قصور خدم وحشم..كل وحدة عندها سيارة بسايق ..ساكنات في ارقى المناطق..امهاتهن سيدات أعمال..

تريدوا تفضحوني قدامهن!!!

سعادة مسيكينة قامت تصيح عورها كلام بنتها اللي مدللتنها وما عمرها قصرت عليها في شيء..تجوّع عمرها عشان بنتها تشبع ..وهذي آخرتها!!!

أما انا عاااااااد دخّنت من صدق وافتن فيها

..موو تقولي يا مسودّت الوجه..هذا كلام تقوليه حال امش يا عديمة المروّة

..لكن ما منش من اهلش اللي خليوش على راحتش علين ركبتي فوق راسهم..وبعدين انتيه ما حد قالش تخرطي عليهن وتقوليلهن امش رئيسة الهند وابوش مدير بنك((ياحليلي مو دراني افكره المدير شيء عود

)) شوفي يا بنت خمّوووس من البيت ماشي طلعة فاااااهمة وخلّيني أشوفش طالعة والا أسمع انش مطوّلة لسانش على امش حرام غير أشخطش بعود اخضر من الصرمة بو قدام بيتكم سامعة مسودّة الوجه

..قالتلي انتي ما لش دخل أمي وأبوي بس اللي يكلموني في هالموضوع!!

قلتلها وســـــــــــــــــــــــــــــ ولا كلمة والا تراني اللحين بسقيش بالخيزران

..شويّة وجاء خلفان وخميس قالوا موهناك مو عندكن صوتكن واصل برع البيت!!!

قلتله خمووس تعال تسمّع بنتك مو تقول..عوين انتوه ما تشرفوها..انتوا فقارى وهيّه بنت ملوك!!

..خلفان عااااااااد من اول فيه ما فيه عليها ويقول حال اخته وزوجها سمعوني هذي البنت علين ما صلبتوها انا براويها بشغلها هذي آخرتها بتجيبلنا الفضيحة الله بالسلامة ما تجيبلنا واحد وتقول زوجوني اياه دام هذي سواياها!!!

ويقوم خمّوووووووووس ويقول حال فتوح سمعيني فلوس ماشي..وطلعة حال الحديقة ماشي اللي بيزورش في البيت حيّاه الله غير كذا ماشي عندي كلام

..

وراحت فتّوح حجرتها تتنقنق

!!! أنا لو مكانها بجلس أصيح بس هذي عينها قويّة عادي عندها ما كنها تكلم رجال بلحاهم!!!

انا وخلفان يوم شفنا السالفة كذا عزمنا نرجع البيت ودّانا خموس ما قصّر وطول الطريق خلفان يقولة همتك بنتك انتبه عليها زين...الخ

لكن البنيّات أرحم من الشباب وفشارهم

اللي يتسلّف سيّارة وفلوس بس عشان يفوشر عند ربيعاته وربعة

..يروح يواعد وحدة ويخرط عليها بذاك الكذب العود أنا ولد وزير

((وأبوه يشتغل فرّاش في وزارة

))..بيتنا قصر في القرم

((وهوه ساكن في خربة

))..أمي وكيله وزارة

((وحياتها أمة تخيط ملابس حال حريم الحارة

))..وعندي سيّارة بي أم اكس 6(

(وهوه سيكل هنود ما عنده

))..ورصيدي في البنك كبيييييير

((وهو ميه بيسة ما تنوجد في مخباه

))

وذيك الهدرة مصدقتنه

..ما اقول غير الله يخلف علينا اذا هالشباب اللي بيبنيوا عمان!!!!!!!!!!

يالله عيالي ترجيوني في خرّوفة غيرها عن سالفة((البنت لولد عمها))

اللحين بروح عند شيبتي أهديه شوية حليله مستضيق من سوايا بنت اخته

حبوتكم موزة

**ملآمح أمل** · 22-01-10 11:32 PM

خخخخ ,,,, حبوة ,, عن يكون آنتي فتووح خخخ
فديتج حبووة كل يوم خروفة أحلى من إللي قبلهـآ ,,,
آلله يهدي هـآلنوعية .. من آلنـآس إنزين مو أيستفيدوآ ,,, غير إحرآج وعوآر رأس ... !!؟؟ بس ترى ,, حكرآت آلنـآس ,,~ْ

ننتظر ,, آلجـآي ,,,’~ْ