تعودت كل يوم المساء اجلس مع جدتي أسمعها وهي تحكيلي عن ايام مضت..قصص عاشتها وعاشوها اجدادنا قبلها..
صحيح انا ما لحقت على ايامهم..بس قصص جدتي عيشتني الاجواء..كنت دائما اول ما تبدأ جدتي تحكي.. اسافر بخيالي لعالم آخر..اعيش مع ابطال القصة..زمن غير زمنا..وحياة غير حياتنا..شفت عند الفلج حريم الحارة مجتمعات..ضحك وسوالف وكل وحدة تغسل مواعين او ملابس..مشيت شوي اتجول في هذا العالم..شفت الشياب جالسين تحت الغافة يسولفوا ويضحكوا قلوبهم بيضاء ما تحمل حقد ولا حسد..استمريت اتجول شفت الاطفال..بنات واولاد يتراكضوا ويضحكوا البراءة عنوانهم..ما يعرفوا لاالبلاي ستيشن ولا الجيم بوي..البنت تلعب مع الولد ما ينخاف عليهم من الافكار السوداء..لا نت مخربنهم ولا افلام تشوشهم..مشيت ومشيت..كنت اشوف الكل يشتغل بجد وهو مبتسم..ماحد يتذمر ولا احد يقول ايش هالعيشة..حياة بسيطة بس السعادة تملأ قلوب الجميع..صحيح بعض الحكايات عبارة عن أساطير ما تدخل العقل..بس اكيد ما تخلو من المتعة والتشويق..قصص السحر والجن..قصص اروع من الافلام اللي نشوفها اللحين..
اكيد كل واحد فيكم يتذكر قصة حكتها الجدة او الجد..اسطورية واحيانا واقعية..شو رايكم تحكوها لنا وتشاركونا المتعة والخيال..او يمكن تكون قرأت قصة من التاريخ العربي القديم وعجبتك ما يضر لو شاركتنا باللي قرأته..
انا حطيت الموضوع بين ايدكم وكل اللي ارجوه اني اشوف قصصكم الممتعة والجميلة منقولة كانت عن لسان الشياب او مقروءة من احد الكتب والروايات..
ولاا تنســــــــــــــــــوا الموضوع بدون مشاركاتكم ماله أي قيمة
مواقع النشر (المفضلة)